សៀមរាប៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបញ្ជាដោយផ្ទាល់មាត់ទៅកាន់រដ្ឋមន្ត្រីក្រសួងសង្គមកិច្ច ឲ្យដាក់បញ្ចូលពលរដ្ឋដែលទទួលសំណងផ្លាស់ប្ដូរទីលំនៅមករស់នៅភូមិរុនតាឯក ស្រុកបន្ទាយស្រី ខេត្តសៀមរាប ឱ្យទទួលបានបាញ់សមធម៌សង្គមទាំងអស់។

ថ្លែងនៅក្នុងវេទិកាសាធារណៈក្នុងជំនួបជាមួយនឹងប្រជាពលរដ្ឋនៅក្នុងភូមិរុនតាឯក ស្រុកបន្ទាយស្រី ខេត្តសៀមរាប នៅព្រឹកថ្ងៃទី១៣ ខែកញ្ញានេះ សម្ដេចតេជោ ហ៊ុន សែន បានលើកឡើងថា ការផ្លាស់ប្ដូរទីលំនៅរបស់ពលរដ្ឋដែលរស់នៅពីរមណីយដ្ឋានអង្គរ តំបន់រុនតែឯកនេះគឺដើម្បីថែរក្សាការពារបេតិកភណ្ឌពិភពលោក តំបន់ប្រាសាទអង្គរ។ សម្ដេចបានអរគុណទៅដល់ពលរដ្ឋទាំងអស់ដែលបានយល់ព្រមទទួលយកសំណងផ្លាស់ប្ដូរទីលំនៅមករស់នៅភូមិរុនតែឯកនេះ។

ជាមួយគ្នានេះសម្ដេចបានបញ្ជាក់ថាពលរដ្ឋដែលបានផ្លាស់ប្ដូរទីលំនៅមករស់នៅតំបន់នេះនឹងត្រូវទទួលបានសមធម៌សង្គមដែលមានដូចជាប័ណ្ណក្រីក្រ និងប័ណ្ណជំនួយសង្គមពីកូវីដ-១៩ ដើម្បីជួយគាំទ្រដល់ពួកគេផងដែរ។

សម្ដេចបញ្ជាក់ថា គោលនយោបាយសម្រាប់អ្នកដែលផ្លាស់ប្ដូរទីលំនៅមករស់នៅភូមិរុនតែឯកនេះគឺមានរយៈពេល ១០ឆ្នាំ ចាប់ពីពេលនេះទៅ។

តាមសម្ដេចតេជោប៉ាន់ប្រមាណ អាចមានពលរដ្ឋ ៦ពាន់គ្រួសារដែលត្រូវបានផ្លាស់ប្ដូរទីលំនៅពីក្រុងសៀមរាប និងតំបន់រមណីយដ្ឋានអង្គរ មករស់នៅក្នុងភូមិរុនតាឯកនេះ៕

^{PHOTO: EAC NEWS}